‘ஒரே இரவில்’ கிரிக்கெட்டராக மாறிய பேஸ்பால் வீரர்

பொதுவா ஜப்பான் நாடுன்னு சொன்னா சுமோ வீரர்கள், அறிவியலில் கில்லாடிகள், மாங்கா காமிக்ஸ், ரஜினியின் முத்து பட ரசிகர்கள் போன்றவை தான் நமக்கு நியாபகம் வரும். ஆனால் அங்கு ஒருவர் ஐபிஎல் தொடரில் விளையாட ஆசையோடு இருக்கிறார் என சொன்னால் நம்புவீர்களா? ஜப்பானுக்கும் கிரிக்கெட்டிற்கும் என்ன சம்மந்தம் என்ற கேள்வி தான் உடனே உங்கள் மனதில் தோன்றும். உண்மையிலேயே அப்படி ஒருவர் இருக்கிறார். ஆம், அவர் தான் 38 வயதாகும் ஷோகோ கிமுரா. 

கிமுரா ஜப்பான் நாட்டின் பிரபலமான பேஸ்பால் வீரர். அங்குள்ள பேஸ்பால் லீக்குகளில் 15 வருடத்திற்கும் மேலாக விளையாடி வரும் அணுபவ வீரர்.  2017-ம் ஆண்டு வயதை காரணம் காட்டி எந்த அணியும் கிமுராவை ஒப்பந்தம் செய்யவில்லை. ஆனால் தன்னால் இன்னும் சில காலம் சிறப்பாக விளையாட முடியும் என்ற நம்பிக்கை கிமுராவிடம் இருந்தது. அந்த சமயத்தில் தான், "நீங்கள் விரும்பினால் எங்களுடன் கிரிக்கெட் விளையாட வாருங்கள்" என ஜப்பான் கிரிக்கெட் சங்கம் அழைத்தது. அடிப்படையில் பேஸ்பாலும் கிரிக்கெட்டும் ஒரேப் போன்றது தானே என்ற நினைப்பில் உடனடியாக களத்தில் இறங்கினார் கிமுரா. 

கிரிக்கெட் பற்றி குறைவாகவே தெரிந்திருந்தாலும், சச்சின் தெண்டுல்கரின் பேட்டிங் வீடியோக்களை பார்த்துவிட்டு தைரியமாக காலில் பேடை கட்டினார் கிமுரா. சூர்யவம்சம் படத்தில் ஒரே பாடலில் சரத்குமார் பணக்காரராக ஆவது போல், பல வருடங்களாக தொழில்முறை பேஸ்பால் வீரராக இருந்த கிமுரா ஒரே இரவில் கிரிக்கெட் வீரராக மாறினார். 

கிரிக்கெட் பயிற்சியின் ஆரம்ப நாட்களில் பல சவால்களை சந்தித்தார். பேஸ்பால் போல் இங்கு பேட்டை மட்டும் சுத்தினால் போதும் என நினைத்துக் கொண்டிருந்த நேரத்தில், பந்திற்கு ஏற்றார்ப் போல் பேட்டை மட்டுமல்ல காலையும் நகட்ட வேண்டும் என பின்பு தான் தெரிந்து கொண்டார். பல சமயங்களில் யார்க்கர் பாலை அடிக்க தெரியாமல் காலில் அடி வாங்கியுள்ளார். 

ஆனால் அவர் மனஉறுதியை இழக்கவில்லை. 2018-ம் ஆண்டு தீவிரமாக பயிற்சி பெற தொடங்கிய கிமுரா, மே மாதத்திற்குள் ஜப்பானின் சிறந்த 20 வீரர்களூள் ஒருவராக இடம் பிடித்தார். மேலும் அந்த வருடத்திலேயே ஹாங்காங்கில் நடைபெற்ற கிழக்கு ஆசிய கோப்பை தொடரில் அறிமுக வீரராக ஜப்பான் அணிக்கு களம் இறங்கினார். 

இதற்கிடையில் அந்த ஆண்டு இந்தியாவில் நடைபெற்ற ஐபிஎல் போட்டிகளை காணவும் டெல்லி வந்துள்ளார் கிமுரா. முதல்முறையாக ஐபிஎல் போட்டிகளை நேரில் பார்த்ததும், அரங்கில் இருந்து பார்ப்பதை விட களத்தில் இறங்கி விளையாட வேண்டும் என்ற ஆசை அதிகமானதுடன் ஐபிஎல் தொடரில் ஏதாவது ஒரு அணியில் இடம் பிடிக்க வேண்டும்  என்று கடுமையாக முயற்சி செய்து வருகிறார்.

ஆனால் இவர் வயதிற்கும் அணுபவத்திற்கும் ஐபில் அணியில் நிச்சியம் இடம் கிடைக்க வாய்ப்பில்லை. ஒருவேளை கரீபியன் டி20 லீக், வங்கதேச பீரிமியர் லீக்கில் முயற்சித்து பார்க்கலாம். ஒருவேளை ஏதாவது ஒரு லீக்கில் கிமுரா விளையாட தகுதி பெற்றால் ஜப்பான் கிரிக்கெட்டிற்கு மிகப்பெரிய உத்வேகமாக அமையும். பேஸ்பால் வீரராக இருந்த கிமுரா கிரிக்கெட் விளையாட தொடங்கியிருப்பது உண்மையில் ஜப்பானில் ஊடக கவனத்தை அதிகரித்துள்ளதோடு கிரிக்கெட் குறித்த விழிப்புணர்வையும் அதிகப்படுத்தியுள்ளது. 

ஆஃப்கானிஸ்தானிற்கு எப்படி ரஷீத் கான் கிடைத்தாரோ அதுபோல் ஜப்பானுக்கு கிமுரா ஷோகோ இருப்பாரா?  

புகைப்பட உதவி: Japan Cricket Association