முதல் போட்டி, முதல் ஓவர், ஹாட்ரிக்: நீண்ட நாள் காத்திருப்புக்கு கிடைத்த பரிசு

தற்போது நடைபெற்று வரும் ரஞ்சி கோப்பையில் மத்தியபிரதேச அணியின் வேகப்பந்து வீச்சாளர் ரவி யாதவ் அரிய சாதனை ஒன்றை படைத்துள்ளார். முதல்தர கிரிக்கெட் போட்டியியோல் தனது அறிமுக போட்டியிலேயே, அதுவும் தான் வீசிய முதல் ஓவரிலேயே ஹாட்ரிக் விக்கெட் எடுத்த முதல் வீரர் என்ற சாதனையே அது. இதில் ஆச்சர்யமான விஷயம், இந்த சாதனையை தான் பிறந்து வளர்ந்த மாநிலமான உத்தரபிரதேச அணிக்கு எதிராகவே படைத்துள்ளார்.

"இது என் அதிர்ஷடமா என தெரியவில்லை. ஆனால் இந்த சாதனை உத்தரபிரதேசத்திற்கு எதிராக வந்துள்ளது. நான் அங்கு சிறு வயதில் இருந்தே விளையாடி வந்தாலும் சரியான வாய்ப்பு கிடைக்கவில்லை. ஒருவழியாக ரஞ்சி வீரராக ஆகியிருப்பது சந்தோஷமாக இருக்கிறது" என்கிறார் 28 வயதான ரவி யாதவ். 

ரெய்னா, ஆர்.பி.சிங் பயின்ற லக்னோவில் உள்ள விளையாட்டு கல்லூரியிலிருந்து தான் ரவியும் தேர்ச்சி பெற்றார். ஆனால் காயம் காரணமாக சுமார் நான்கு ஆண்டுகள் கிரிக்கெட் விளையாடாமல் இருந்தார். 

அவர் கூறுகையில், எனது எதிர்காலம் கேள்விக்குறியாக இருந்தது. என்னுடன் U19 அணியில் விளையாடியவர்கள் எல்லாம் முன்னேறி சென்று கொண்டிருந்ததை பார்த்த போது நான் மட்டும் ஏன் இப்படி இருக்கிறேன் என தோன்றியது. எனக்கும் உத்வேகம் பிறந்தது. ஆனால் துரதிஷ்டவசமாக எனக்கு உத்தரபிரதேச அணியில் இடம் கிடைக்கவில்லை". 

இதனால் 2016-ம் ஆண்டு மத்தியபிரதேச கிரிக்கெட் சங்கத்தில் பதிவு செய்துகொண்ட ரவி யாதவ், உள்ளூர் போட்டிகளில் சிறப்பாக பந்துவீசி மத்தியபிரதேச அணியின் வலைப்பயிற்சி பவுலராக தேர்வானார். "மூன்று வருடங்களாக நான் வலைப்பயிற்சி பவுலராக இருந்தாலும் என்னை யாரும் மோசமாக நடத்தவில்லை. கிடைக்கும் வாய்ப்பை நன்றாக பற்றிக்கொள் என மூத்த வீரர்கள் என் மீது கரிசனையாக இருந்தனர். இவ்வுளவு நாள் காத்திருப்புக்கு இப்போது நல்ல பலன் கிடைத்துள்ளது". 

மேலும் ரவி கூறுகையில், "கிரிக்கெட்டிற்காக எனது ரயில்வே பணியை ராஜினாமா செய்தேன். வாழ்க்கையில் என்ன செய்யப் போகிறாய் என எனது குடும்பத்தினர் ஒவ்வொரு முறை கேட்கும்போதும் என்னிடம் எந்த பதிலும் இருக்காது. அப்போதெல்லாம் நான் தோல்வியடைந்த ஒருவனாகவே உணர்ந்தேன். இன்று அவர்களிடம் ரஞ்சி போட்டியில் விளையாண்டது குறித்தும் என்னுடைய ஹாட்ரிக் சாதனை குறித்தும் பெருமிதமாக கூறினேன்". 

உத்தரபிரதேச U19 அணியில் இவரோடு விளையாடிய குஷ்வீர் சிங் சிறந்த நண்பராவார். உன்னுடைய அறிமுக போட்டியில் ஐந்து விக்கெட் எடுத்தால் அடுத்த நாள் நான் எங்கிருந்தாலும் நீ விளையாடுவதை பார்க்க வருவேன் என ரவியிடம் முன்பு கூறியுள்ளார். "அதனால் நாளை இன்னும் இரண்டு விக்கெட் எடுக்க வேண்டும்" என கூறி சிரிக்கிறார் ரவி யாதவ்.